અંદર એટલાં પણ નહીં ઉતરીએ, કે ફસાઈ જઈએ,
બહાર એટલાં પણ નહીં નીકળીએ, કે પંકાઈ જઈએ,

સીમાઓમાં રહેવું, ઘણી સારી વાત છે, પણ –
સીમાઓ એટલી પણ નહીં બાંધીએ, કે પુરાઈ જઈએ,

દુનિયા આખી જ એક રંગમંચ, એમાં બે મત નહીં, પણ
અભિનય એટલો પણ નહીં કરીએ, કે પકડાઈ જઈએ,

જીવન છે ત્યાં સુધી, સ્પર્ધા તો રહેવાની જ, પણ
દોટ એટલી પણ નહીં મુકીએ, કે ફસડાઇ જઈએ,

થોડું ઘણું હોય ત્યાં સુધી ઠીક છે, સહન કરીએ, પણ
ડૂમો એટલો પણ નહીં ભરીએ, કે ગુંગળાઈ જઈએ,

મળતાવડા સ્વભાવથી વધારે સારું તો શું હોય, પણ
સંબંધો એટલાં પણ નહીં બાંધીએ, કે ઘેરાઈ જઈએ,

સમય સાથે થોડો બદલાવ પણ જરૂરી છે “કાચબા”,
એકધારા એટલાં પણ નહીં થઈએ, કે ફેંકાઈ જઈએ.

– ૦૯/૧૦/૨૦૨૧

[સંબંધોમાં અમૂક નિયમો પાળવા જોઈએ અને થોડું થોડું કષ્ટ પણ સહન કરવું પડે તો કરી લેવું જોઈએ. પણ એ બધાની પણ હદ હોવી જોઈએ, એક હદથી બહાર પણ નિકટતા સારી નહીં, “અતિ સર્વત્ર વર્જયેત“…એક હદથી વધારે ખાંડ પણ શરીર માટે ઝેર છે…]